يامل قلبً قاسي الهم - للشاعر محمد الروقي العتيبي

[ابو خالد]

[poem=font="simplified arabic,5,#ff9200,bold,normal" bkcolor="#121201" bkimage="" border="none,4,#400000" type=0 line=0 align=center use=ex num="0,#400000"]
يامل قلبً قاسي الهم خمه = قلبً غدا للهم مضوى ومسراح
طرد الهوى فالوقت ماهوب همه = ولاهوب همه كيف تحقيق الارباح
توالفو سقمه وهمه وغمه = ولاعاد اتوق لكل مزنً ليا لاح
ويارجمي اللي كل مارحت يمه = مانيب لا زاير ولا نيب سواح
ارمي عليك هموم وقتي وظلمه = وارمي عليك امواه عيني والاملاح
انت الوحيد اللي همومي تهمه = بك خاطري لاجيت يسلا ويرتاح
هم يحسبون الطيب فالرجل فهمه = وانه بزين الهرج شاطر ومزاح
لاشفت هرجه قلت وش ذا المطمه = تجي معه لاجاك وتروح لاراح
وش عاد لو يرفع على الناس خشمه = ويقول انا الطيب وللنفس مداح
اقلوبهم تعدي ورا كل نمه = واجسامهم مثل السواري والالواح
وان عودت للصدق والصدق ذمه = للخيل خياله وللبحر سباح
المرجله تصعب على كل رمه = ماتنكسب بفلوس وانفاق وسلاح
تبالها رجلً يفادي بدمه = رجلً على ما قيل للموت نطاح
يشهر كما الشيهان في كل قمه = يصبر على صكات بقعا ليا طاح
يارد على هداج من قو عزمه = وتلقاه وقت العسر للحيل ذباح
يشيل همك شيل حتى يحسمه = وقت الشدايد للعرب درع ووشاح
اقولها والقلب لو فاح دمه = ماهوب من كثر الهواجيس بواح
من لا نفع ربعه بوقت المهمه = اخير يقعد مع مدامه ويرتاح
[/poem]



للشاعر محمد الروقي العتيبي

[ادارة الملتقى]

الله يعافيك ابوخالد على نقلك للقصيده

وصح لسان قايلها

[يوسف ابن شريد]

سلمت يا ابو خالد

على جزالة الاختيار

ابيات جازت لي

هم يحسبون الطيب فالرجل فهمه*****وانه بزين الهرج شاطر ومزاح
لاشفت هرجه قلت وش ذا المطمه ***** تجي معه لاجاك وتروح لاراح
وش عاد لو يرفع على الناس خشمه ***** ويقول انا الطيب وللنفس مداح
اقلوبهم تعدي ورا كل نمه ***** واجسامهم مثل السواري والالواح
وان عودت للصدق والصدق ذمه ***** للخيل خياله وللبحر سباح
المرجله تصعب على كل رمه ***** ماتنكسب بفلوس وانفاق وسلاح

تقبل مروري